საგანგებო სიტუაციების მართვის სამსახური საქართველოს მასშტაბით მოხალისეთა სისტემის დანერგვას იწყებს. მოხალისეობის მსურველებს სპეციალურ პლატფორმაზე დარეგისტრირება 1 ნოემბრიდან შეეძლებათ.
„სამოქალაქო უსაფრთხოების შესახებ“ კანონის თანახმად, მოხალისე შეიძლება გახდეს საქართველოს მოქალაქე, რომელსაც 18 წელი შეუსრულდა; საკომუნიკაციო დონეზე ფლობს ქართულ ენას და არ არის ნასამართლევი განზრახ მძიმე დანაშაულისთვის.
გარდა ამისა, მოხალისემ საგანგებო სიტუაციების მართვის სამსახურს უნდა მიაწოდოს ზუსტი ინფორმაცია მისი ჯანმრთელობის შესახებ, რათა არ მოხდეს ჩართვა ისეთ მოხალისეობრივ საქმიანობაში, რომელიც შეიცავს მისი ჯანმრთელობის დაზიანების ან სიცოცხლის მოსპობის რისკს.
საგანგებო სიტუაციების მართვის სამსახური მოხალისეებს კოორდინაციას გაუწევს და ევროკავშირისა და აშშ-ს მხარდაჭერით გადაამზადებს.
"რეგინფო"